بما انه الحكومة قررت رفع شعار ميلودي "أفلام عربي, أم الاجنبي" , و فرضت رسوم اضافية على الافلام اللي جاية من برا, قررت اقوم انا ايضا بدوري في تشجيع السينما العربية, وعشان هيك انا بدعوكم لمشاهدة هذه النسخ العربية من هاي الافلام الاجنبية :
Inception
في هادا الفيلم ليوناردو دي كابريو وجماعتو بخترقوا الاحلام و بعملو اشي اسمو الاستهلال "هيك كانوا مترجمينها بالسينما ايام ما كان عنا سينما" , هلأ هادا الاستهلال كان بقنع الناس بأفكار تانية و بزرعها داخلهم.
النسخة العربية
ما حد بعرف مين كان ليوناردو تبعنا احنا ! بس ليوناردو تبعنا بحط ابو عيون زرق بجيبتو, ليوناردو الاجنبي قضى كل الفيلم عشان يعمل "استهلال" واحد لشخص واحد ! بينما ليوناردو تبعنا عمل استهلال على مجلس نواب كامل بجلسة واحدة ! و أقنعهم انه "صاحبنا" بريء تماما من قصة الكازينو !
Lion King
في هادا الفيلم الاسد الأب علم ابنه كيف يكون حنون على حيوانات الغابة و يحميهم من الحيوانات المفترسة
النسخة العربية
في عنا نسخة طبق الاصل عن هادا الفيلم بتيجي كل يوم على قناة سوريا للأخبار ! , الأسد الأب علم ابنه كيف يكون حنون على الشعب و كيف يحميهم من العصابات المسلحة !
Catch me if you can
في هادا الفيلم برضو ليوناردو"بكون عمره 17 و قد النتفة" بدوخ "مكتب التحقيقات الفيدرالي" كله وراه و بكون سارقله كم شيك مصاري ! ما حد بكون عارف وينه بس اخر الفيلم بجيبوه من ذينيه.
النسخة العربية
في الأردن عنا نفس النسخة بالزبط بس على أكبر بكتير, الحرامي أكبر و مش قد النتفة, و سارق مصاري اكتر بكتير ! ومدوخ وراه بلد بحالها ! الفرق الوحيد انو احنا عارفين وينه و مش عارفين نجيبه "أو بدناش نجيبه" !!
Mission Impossible
توم كروز بكون اسمه ايثان هنت, عميل مخابرات اخو شلن ! فيش حدا بطلع معو براس ! وأية مهمة وان كانت مستحيلة بعمل أبوها !
النسخة العربية
عنا هون في الاردن, نزل شب خنشور يوم الخميس الظهر عشان يوقف تكسي ! راح يعاني و @$#$##$ !! بس اخر اشي بطلع, الفرق انو توم كروز نفذ المهمة المستحيلة في تلات اجزاء, بس صاحبنا الخنشور عملها بجوز بعد عشر أجزاء و ليرة زيادة على العداد !!
BraveHeart
في هادا الفيلم ويليام والاس بحارب كل بريطانيا لحاله ! كل هاد عشان قتلوا مرته , وما حد بنسى خطابه تبع الحرية ! حرررررررررررررييييييييييية !
النسخة العربية
في عنا واحد قائد نفس الاشي ! بحارب بريطانيا كمان لحاله ! و ما حد بنسى خطابه الشهير تبع الزنقة ! الى الأماااااااااااااااااااااااااااااااااام !
الفرق الوحيد انه مخرج هداك الفيلم قتل مرته لأبو الوليام ! اما مخرج فيلم القذافي ما قتل ولا وحدة من حارساته للقذافي, عملا بمقولة تهامي باشا : "تقتلوا الصاروخ لييييه ؟ ده يبقى فيلم زبالة !"
500 days of summer
عاد هادي افهموها لحالكو, بدهاش تفسير ! الواحد صار بده يطلع من اواعيه ! Mo2a8at
