منسف برازيلي

" النشامى ما منهم سلامة "

فارس عوض

كافاني, سواريز و فورلان, بجوز هدول بس الي بعرفهم من منتخب الاوروغواي, بس مبدئيا هدول بسوا اكتر من 150 مليون يورو

يوم الجمعة و بعد حملة يوم كامل من التلفزيون الاردني – الي لساتو شغال على ما يبدو – تم جمع ما يقارب 2 مليون دينار لدعم المنتخب الوطني الي ناوي يروح ع البرازيل , و مبلغ زي هاذ بطرح عدة اسئلة بعضها موضوعية 

السؤال الاول:

اذا ما اتأهلنا وين رح تروح المصاري ؟

السؤال الثاني:

اذا تأهلنا وين رح تروح المصاري ؟

السؤال التالت:

لنفترض جدلا انا تأهلنا, و المصاري جد راحت للمنتخب, كم رح يوصل المنتخب منهم ؟

السؤال الرابع:

 اي اصبع من رجل كافاني بشترولنا ال 2 مليون ؟

اعزائي, الاردن لم تكن يوما دولة غنية بمواردها الطبيعية, لكن الثروة الحقيقية التي يملكها هذا الشعب كانت دوما في ابنائه, في عقولهم و افكارهم و قدراتهم, بل حتى –كما يبدو في اقدامهم-.

قد نكون دولة فقيرة, فقراء و لكن نمتلك اقل نسبة امية في العالم العربي, فقراء و لكن نملك اعلى نسبة من خريجي الجامعات في العالم العربي, فقراء و لكن نمتلك افضل موارد صحية و علاجية في الشرق الاوسط, فقراء و لكن نمتلك واحدا من افضل منتخبات اسيا في كرة القدم و كرة السلة.

اصدقائي, الاحتمال الاكبر انا رح نخسر بكرا, و في الاياب كمان, لكن هذا لا يقلل من حجم انجاز مجموعة لاعبين تلات ارباعهم بشتغلوا برا المنتخب لتوفير لقمة العيش , و كرة القدم لهم مش اكتر من متنفس بهربوا فيه من هذه الحياة الطاحنة

الحلم بعيد المنال, لكن مش غلط لو حلمنا شوي, الاحلام هي الشيء الوحيد الذي تبقى لنا في هذا العالم.

الله مع النشامى, و يلا نِشَرِب المنسف بينما نرقص السامبا, في البرازيل ..